نوێنەرانی ئازادكراوانی بادینان لەسەر پرسی دەستگیركردنی چالاكواناندا روونكردنەوەیەك بڵاودەكەنەوە و داوا دەكەن بەرپرسیارانە مامەڵە لەگەڵ ئەو دۆسیەدا بكرێت.
لە روونكردنەوەكەدا هاتووە، پێویستە بابەتی دەستگیركردنی چالاكوانانی بادینان تێكەڵ بە بابەت و ئامانجی كەسی نەكرێن و بەرپرسیارانە و هەستیارانە بەرامبەر ئەم كەیسە مێژووییە مامەڵە بكرێت، چونكە ئەو رووداوە ئاشكراكردنی رووی راستەقینەی ئەم دەسەڵاتە ستەمكارە دەردەخات كە بە دیاریكراوی لە ماوەی 32 ساڵی رابردووی حوكمڕانیی كوردیدا لە باشوور گرتن و ڕفاندنی رۆژنامەنووسان و چالاكوانانی بادینان تاكە دۆسیەیە بۆ ماوەی نزیكەی سێ ساڵە بە زیندوویی ماوەتەوە و كۆدەنگییەكی لە زاخۆ تا خانەقین لەسەرە.
ئاماژە بۆ ئەوەش كراوە، رەوەندی كوردی و سەرجەم چین و توێژەكان لەسەر ئەو پرسە هاوڕان كە پشتگیری ئەم كەیسە بەرز دەنرخێنین، لە ھەمانكاتدا جەخت لەسەر سەربەخۆیی دۆسیەكە دەكەینەوە و بۆیە زۆر گرنگە وەك دەسكەوتێكی مێژوویی ئەم رێبازە بپارێزرێت و لە خەون و خەیاڵ و ئارەزووی كەسی و نەزۆكی بە دوور ڕابگیرێت.
