تەندروستیی عێراق زیادبوونی زۆر لە ژمارەی تووشبووانی شێرپەنجە بە هەموو جۆرەکانی لە ماوەی ساڵانی 2022 و 2023 دووپاتدەکاتەوە، هاوکات لەگەڵ کەمیی توندی دەرمان و ئامێر و ئامرازەکانی چاودێری لە نەخۆشخانە حکومییەکان.
وەزارەتی تەندروستیی عێراق رایگەیاندووە، لە ئێستادا زیاتر لە 30 هەزار توشبووی شێرپەنجە لەو وڵاتە چارەسەر وەردەگرن، نیگەرانیی خۆی دەربڕی لە دواکەوتنی دەستنیشانکردنی نەخۆشییە مەترسیدارەکە.
ئاژانسی هەواڵی عێراقی لە زاری سەیف ئەلبەدر وتەبێژی وەزارەتەکەوە بڵاویکردەوە، “کێشەیەکی گەورەمان هەیە، ئەویش دواکەوتنە لە دەستنیشانکردنی حاڵەتەکانی شێرپەنجە بەتایبەتی شێرپەنجەی مەمک”.
دووپاتیشیکردەوە کە “شێرپەنجە یەکێکە لە دە هۆکارە سەرەکییەکانی مردن لە عێراق، هەروەها لە رۆژهەڵاتی ناوەڕاستیشدا”، ئاماژەی بەوەشکرد، “شێرپەنجە کێشەیەکی جیهانییە کە لە پەرەسەندندایە، هەروەها ڕێژەی تووشبوون لە عێراق کەمترە لە 80 حاڵەت لە هەر 100 هەزار عێراقییەک لە ساڵێکدا، ئەمەش لە چێوەی تێکڕای ستانداردی جیهانیدایە”.
