ئەمشەو، شەممە لە چوارچێوەی ڕوبەڕوبوونەوەکانی هەفتەی 13ی خولی پلە یەکی ئیسپانیا، یانەی ڕیاڵ مەدرید یاری دێربی مەدریدی بە ئەنجامی دوو گۆڵی بێوەڵام لە ئەتلەتیکۆ مەدرید بردەوە.
لە تایمی یەکەمدا ئەستێرەکانی لۆس بلانکۆس بە شێوە یاریکردنی ئاسایی خۆیان توانیان کۆنتڕۆڵی یاریگا بکەن، لەگەڵ دەستپێکدا هێرشیانکردە سەر گۆڵی یان ئۆبلاک و چەندین هەلی مەترسیداریان ڕەخساند.
لە خولەکی 15 بە لێدانی سەر کاسیمێرۆ گۆڵی پێشەنگی تۆمارکرد، لەبەرانبەردا ئەستێرەکانی سیمیۆنی لە دوای ئەم گۆڵە کاردانەوەی بەهێزیان نەبوو، بەڵکو شاهانەییەکان تاوەکو کۆتا ساتەکانی تایمی یەکەم باڵادەستیان نیشاندا و ئەو تایمە بە ئەنجامی گۆڵێکی بێوەڵام کۆتاییهات.
لە سەرەتاکانی تایمی دووەم هەمان سیناریۆکانی تایمی یەکەم دووبارەبوونەوە، دانی کارڤاخال لە خولەکی 63 بە لێدانێکی بەهێز گۆڵی دووەم و فراوانکەری ئەنجامەکەی تۆمارکرد.
لە کاردانەوەی گۆڵی دووەمدا ڕۆزی بلانکۆس کاردانەوەی شەرمنانەی نیشاندا و چەند هەلێکیان ڕەخساند، بەڵام سەرکەوتوو نەبوون لە تۆمارکردنی گۆڵ، یارییەکەش بە ئەنجامی دوو گۆڵی بێوەڵام لە بەرژەوەندی ئەستێرەکانی زێدان کۆتاییهات.
بەپێی ئەنجامە تۆمارکراوەکە، ئەتلەتیکۆ مەدرید بە شێوەیەکی کاتی بە 26 خاڵەوە لە لوتکەی ڕیزبەندی یانەکانی لالیگا بەردەوامبوو، بەڵام یانەی شاهانە بە چنینەوەی سێ خاڵی دێربی ژمارەی خاڵەکانی لەم وەرزە گەیاندە 23 و لە پلەی سێیەمی ڕیزبەندی یانەکاندا جێگیربوو.
