نادیە موراد-ی چالاكوانی ئێزدی بە یاوەری ئەنجلینا جولی-ی ئەستێرەی جیهانی و ئیریك شوڤالییە باڵیۆزی فەرەنسا سەردانی گوندی كۆجۆ لە قەزای شەنگال دەكەن.
گوندەكە لە ساڵی 2014دا لەسەر دەستی داعش رووبەڕووی راوەدونان و كۆمەڵكوژی بووەوە.
لەمیانەی سەردانەكەیاندا نادیە موراد و ئەنجلینا جولی چاویان بە دانیشتووانی گوندەكە كەوت، پاشان گۆڕستانی كۆجۆ-یان بەسەركردەوە.
لە ئابی 2014دا چەكدارانی داعش هێرشیان بۆسەر شەنگال و گوندەكانی دەوروبەری ئەنجامدا، بەهۆیەوە هەزاران كەس ئاوارەبوون، گروپەكە پیاوان و گەنجانیان كۆمەڵكوژ كرد، كچ و ژنانیش بە كۆیلە و سەبایا كران.
بەهۆی گەورەیی تاوانەكانەوە لە ساڵی 2019دا پەرلەمانی كوردستان رووداوەكانی سەر ئێزدییەكانی بە لەناوبردنی بەكۆمەڵ ناوبرد و 3ی ئاب-یشی بە رۆژی یادكردنەوەی كارەساتەكە دیاریكرد.
لە ساڵی 2016دا نەتەوە یەكگرتووەكان نادیە مورادی بە باڵیۆزی نیازپاكی دەستنیشانكرد بەهۆی بەرگریكردنەكانی لە رۆڵەكانی نەتەوەكەی، دوو ساڵ دواتریش خەڵاتی نۆبڵی ئاشتی بەدەستهێنا.
