ئێوارەی دوێنێ گەنجێك لە زاخۆ كوژرا، بەپێی زانیارییەكان رووداوەكە لەسەر كێشەی پارە بووە و بكوژەكەش كوڕی بەرپرسێكی پارتییە.
ئێوارەی دوێنێ گەنجێك بەناوی ئەمیر سەڵاح (31 ساڵ) لە كافتریایەكی نزیك پردی دەلال لە زاخۆ لەلایەن كەسێكەوە كوژرا.
سەرچاوەیەكی ئاگادار بە تۆڕی میدیایی ئێستای راگەیاند، قوربانییەكە باوكی منداڵێكە، هاوسەرەكەی دووگیانە و چاوەڕوانی لەدایكبوونی منداڵی دووەمی بووە.
ئەوەشی وت، “رووداوەكە لەسەر كێشەی پارە بووە، تۆمەتبارەكەش كوڕی (ئ. ك) بەرپرسی پارتییە لە سنووری شەنگال”.
سەرچاوەكە ئەوەشی خستەڕوو، بكوژەكە سەرەتا سێ فیشەكی بە قاچییەوە ناوە، دواتر گەڕاوەتەوە و دوو فیشەكی دیكەی بە سنگییەوە ناوە.
دوێنێ ئەحمەد رەمەزان، وتەبێژی بەڕێوەبەرایەتیی پۆلیسی زاخۆ لە کۆنگرەیەکی رۆژنامەنووسیدا رایگەیاند، بەپێی لێكۆڵینەوەكان قوربانییەكە پێنج گولـلەی دەمانچەی بەرکەوتووە، بەرلەوەی بگاتە نەخۆشخانە گیانیلەدەستداوە.
وتیشی، “پۆلیس لە ماوەیەکی کورتدا ناسنامەی تاوانبارەکەی ئاشکراکرد و دواتر بە هاوکاری کەسوکارەکەی، تاوانبار رادەستی پۆلیس کرا”.
