بافڵ جەلال تاڵەبانی، سەرۆكی یەكێتیی نیشتمانیی كوردستان دوای ئەوەی گلەیی و سكاڵایەكی زۆری هاوڵاتییانی پێگەیشتبوو، سەردانی گەڕەكی سەرچناری شاری سلێمانی كرد و ژینگەی شێوێندراو و دوور لە بەها باڵاكانی كۆمەڵگەی كوردەواری بینی، بڕیاریدا بە داخستنی سەرجەم ئەو شوێنانەی دوورن لە ئایین، ئاكار و رەوشتی بەرزی كۆمەڵگەی كوردییەوە.
سەرۆك بافڵ وتیشی، “سەرچنار یادەوەرییەكی شیرینی شارە حەیاتەكەیە و دەبێت بگەڕێتەوە بۆ ئەو سەردەمەی خێزانەكانی شار بۆ پشوو و كات بەسەربردن روویان تێدەكرد و هەستیان بە ئارامی دەكرد، ئەم بڕیارەش لەپێناو پاراستنی ئارامی و رەخساندنی ژینگەیەكی لەبارە بۆ خەڵكە خۆشەویستەكەی شارەكەمان”.
راشیگەیاند، “یەكێتی پارێزەری مافە كەسی و تایبەتەكانە، بەڵام ئەوكاتەی سنوورەكان دەبەزێندرێت و رێز لە بەها باڵاكان ناگیرێت، هەڵوێستمان دەبێت”.
