لیژنەکانی قائیمقامیەتی سلێمانی دەستیانگرت بەسەر کۆگایەکی پڕ لە خۆراکی بەسەرچوودا کە پاشماوەی قرتێنەرەکانیان تێدابووە.
لەو بارەیەوە باوان عەبدولکەریم، لە لیژنەکانی قائیمقامیەتی سلێمانی بە تۆڕی میدیایی ئێستای وت، کۆگاکە چەند جۆرێک خۆراکی تێدایە و جگە لەوەی بە خراپی کۆگاکراون و شێ و کەڕوویان کردووە، پاشماوەی قرتێنەریشیان تێدابووە.
ئەو ئەندامەی لیژنەکانی قائیمقامیەت ئاماژەی بەوەکرد، کۆگاکە هیچ مەرجێکی تەندروستی و هەڵگرتن و کۆگاکردنی خۆراکی تێدانییە، لەگەڵ ئەوەشدا مۆڵەتی نییە.
ئاماژەی بەوەکرد، کە قائیمقامیەتی سلێمانی بڕیاری داخستنی کۆگاکەی داوە، هەروەها خاوەنەکەی ڕووبەڕووی ڕێکاری یاسایی دەکرێتەوە.
