وەزارەتی خوێندنی باڵا و توێژینەوەی زانستیی هەرێم ڕایدەگەیەنێت، سبەینێ كاتژمێر 1ی پاش نیوەڕۆ ئەنجامی وەرگرتنی دەرچووانی قۆناغی دوانزەی ئامادەیی لە زانكۆ و پەیمانگەكانی هەرێمی كوردستان ڕادەگەیەنرێت.
بەپێی ڕاگەیەندراوێكی وەزارەتی خوێندنی باڵا و توێژینەوەی زانستی كە وێنەیەكی دەست تۆڕی میدیایی ئێستا كەوتووە و تێیدا هاتووە، سبەینێ چوارشەممە كاتژمێر 1ی پاشنیوەڕۆ لە كۆنگرەیەكی ڕۆژنامەوانیدا ئەنجامی وەرگرتنی دەرچووانی قۆناغی دوانزەی ئامادەیی لە زانكۆ و پەیمانگەكانی هەرێمی كوردستان ڕادەگەیەنرێت.
لە ڕاگەیەندراوەكەدا هاتووە، تەواوی وردەكارییەكانی وەرگرتنی دەرچووان لە زانكۆ و پەیمانگەكان و ژمارەی پێشكەشكاران و وەرگیراوان بە شێوازە جیاجیاكان ڕادەگەیەنرێت و دوای ڕاگەیاندنی ئەنجامەكانیش دەرچووان دەتوانن شوێنی وەرگرتنیان لە زانكۆ و پەیمانگەكان وەربگرنەوە.
