شیكەرەوەیەكی سیاسیی ئەمریكی دەڵێت، بایدن و ئیدارەكەی دەیانەوێت سعودیە پەیوەندییەكانی لەگەڵ ئیسرائیل ئاساییبكاتەوە.
جۆرج كاڤیرۆ شیكەرەوەی سیاسی لە پەیمانگەی خۆرهەڵاتی ناوەڕاست و سەرۆكی جێبەجێكاری پەیمانگەی وڵاتانی كەنداو بۆ شیكاری، هەوڵی ئیدارەی جۆ بایدن سەرۆكی ئەمریكا بۆ ئاساییكردنەوەی پەیوەندیی نێوان سعودیە و ئیسرائیل ئاشكرادەكات و دەڵێت، “ئەمریكا دەیەوێت سعودیە هاوشێوەی ئیمارات و بەحرەین هەنگاوبنێت”.
ئەو شیكەرەوە سیاسییە بە دووری دەزانێت سعودیە بەمنزیكانە ئەو هەنگاوە بنێت و دەڵێت، ئاشتەوایی لەگەڵ ئیسرائیل و ئاساییكردنەوەی پەیوەندی لەگەڵ ئەو وڵاتە، بۆ سعودیە مەترسیدارە.
بەپێی وتەی سەرۆكی جێبەجێكاری پەیمانگەی وڵاتانی كەنداو بۆ شیكاری، ئەمریكا هەوڵدەدات لە ڕێگەی ئیسرائیل و وڵاتانی ئیسلامی و عەرەبییەوە لەوانە سعودیە، هەژموون و پاوانخوازیی ئێران لە ناوچەكەدا ڕابگرێت و تاران لاوازبكات.
