فەرماندەی گشتیی هێزەكانی سوریای دیموكرات (هەسەدە) پێشوازیی لە بڕیارێكی ئەمریكا دەكات، كە لە ڕێگای ئەو یاسایەوە، دەستی سوریا لەو سەرچاوە ئابورییانە دەبڕێت، کە بەهۆیەوە دەتوانێت بەردەوامیی بە شەڕ و ململانێ سەربازییەکانی بدات.
مەزڵوم عەبدی، فەرماندەی گشتیی هێزەکانی سوریای دیموکرات، لە تویتێکدا كە لە هەژماری تایبەتیی خۆی لە تۆڕی كۆمەڵایەتیی تویتەر بڵاویكردووەتەوە نووسیویەتی، پێشوازیی لە بڕیارەکەی ئەمریکا دەکەن و بەرز دەینرخێنن بۆ بونیاتنانەوەی ژێرخانی ئابوریی باکوور و ڕۆژهەڵاتی سوریا.
پێشیوایە، ئەوە هەنگاوێکە بۆ ڕێگریی لە گەڕانەوەی داعش و ئومێد بە هەموو سورییەکان دەبەخشێت.
مەزڵوم عەبدی جەختیشی كردووەتەوە،”پێشوازیی لە هەموو کۆمپانیایەک دەکەین، کە بیانەوێت لێرە وەبەرهێنان بکەن”.
یاساکە بەناوی کەسێکەوە ناونراوە، کە نەیاری ئەسەد بووە و لە زیندانی سوریا هەڵاتووە و زنیاریی لەسەر دۆخی ناو زیندان و ئەشکەنجەدانی زیندانیان داوە بە ڕێکخراوە جیهانییەکان، ئەمریکا دەیوت، لە ڕێگای ئەو یاسایەوە، دەستی سوریا لەو سەرچاوە ئابوورییانە دەبڕێت، کە بەهۆیەوە دەتوانێت بەردەوامیی بە شەڕ و ململانێ سەربازییەکانی بدات.
