سەرۆكی فراكسیۆنی یەكێتی لە ئەنجومەنی نوێنەرانی عێراق هۆشداریدەدات لەبارەی بڕیارەكەی دادگای فیدراڵییەوە و دەڵێت، “دەبێت حكومەتی هەرێم سوود لە دەستووری عێراق وەربگرێت سەبارەت بەو بڕیارەی دادگای فیدراڵی كە هەرێمی كوردستان بە كەمترین زەرەر لێی دەربچێت”.
هەرێم كەمال ئاغا، سەرۆكی فراكسیۆنی یەكێتیی نیشتمانیی كوردستان لە ئەنجومەنی نوێنەرانی عێراق لەلێدوانێكدا بە تۆڕی میدیایی ئێستای ڕایگەیاند، “هیوادارم حكومەتی هەرێم و ئەو كەسانەی شیكردنەوە بۆ بڕیارەكەی دادگای فیدراڵی لەبارەی دۆسیەی نەوتی هەرێمی كوردستانەوە دەكەن سوود لە ماددەكانی 111، 112 و 117ی دەستوور وەربگرن بتوانن بە زیرەكانە دانوستان لەسەر بڕیارەكەی دادگای فیدراڵی لەگەڵ حكومەتی عێراق بكەن”.
سەرۆكی فراكسیۆنی یەكێتی هۆشداریدا و وتی، “ناتوانرێت بڕیارەكەی دادگای فیدراڵی جێبەجێنەكرێت، بەڵام دەتوانین بە زیرەكانە زیانەكانی بڕیارەكەی دادگای فیدراڵی لەسەر هەرێمی كوردستان كەمبكەینەوە”.
هەرێم كەمال ئاغا پێیوایە، لە هەرێمی كوردستان كەرتی نەوت چەند كەس و كۆمپانیایەك لێی سوودمەندبوون بۆیە هاوڵاتییان بە ئابوریی سەربەخۆ و سێكتەری نەوت دڵخۆشنەبوون”.
