بەپێی ئامارێکی کۆڵبەر نیوز، لە ماوەی ساڵی ڕابردوودا 54 کاسبکار و کۆڵبەری کورد لە چەند ڕووداوێکی جیاجیادا و بە تەقەی ڕاستەوخۆی هێزە ئەمنییەکانی ئێران کوژراون.
بەپێی ئامارەکە، لەو ژمارە قوربانییە، 26 هاوڵاتییان بە تەقەی ڕاستەوخۆی هێزە ئەمنییەکانی ئێران کوژراون.
هاوکات بەپێی ئامارێکی ڕێکخراوی “هەنگاو” لەماوەی ساڵی ڕابردوودا 48 هاوڵاتیی کورد لەسێدارە دراون و زیاتر لە 500 کەسی دیکەش دەستگیرکراون و 103 کەسیان سزای لەسێدارەدان و بەندکردن و لێدانی قامچیان بەسەردا سەپاوە”.
لەگەڵ ئەوەشدا 30 هاوڵاتیی مەدەنی کوژران و برینداربوون و 18 بەندکراویش لە زیندانەکانی ڕۆژهەڵات گیانیان لەدەستداوە.
لە کۆی ئەو کۆڵبەر و کاسبکارانەی کوژراون، هەشت کەسیان بە سەرما و گیرخواردن لە بەرزاییەکاندا گیانیان لەدەستداوە، سێ کەسیان بەهۆی خنکان لەناو ڕووبارەکاندا و پێنج کەسیان لە ئەنجامی پێکدادانی هاتوچۆ و یەکێکی دیکەش لە ئەنجامی ئەشکەنجەی هێزە ئەمنییەکانی ئێران کوژراون.
جگە لە هێزە ئەمنییەکانی ئێران، چوار کاسبکاری کورد لەلایەن هێزە ئەمنییەکانی تورکیاوە کوژراون و ژمارەیەکی دیکەش دەستگیرکراون.
هاوکات لە ئەنجامی مەترسیی ڕێگاکانی کۆڵبەری و هاتوچۆی کاسبکاران و هەروەها تەقەی هێزە ئەمنییەکان، 221 کەس بریندار بوون، کە بەشێک لە بریندارەکان یەکێک لە ئەندامانی جەستەیان لەدەستداوە.
