لە یادی لەدایكبوونی پەیامبەری ئیسلامدا، ئەمینداری گشتیی یەکگرتووی ئیسلامی ڕایگەیاند، دەسەڵاتدارانی هەرێم پێیانەوە دیارنییە شانازی بە ئایینی ئیسلامەوە بکەن.
سەڵاحەدین بەهادین، ئەمینداری گشتیی یەکگرتووی ئیسلامی ڕاشیگەیاندووە، “ڕاستییەكی تاڵ هەیە دەبێت لەم بۆنە پیرۆزەدا ڕاشكاوانە بیخەینەڕوو بەهیوای چاكسازی و ڕاستكردنەوەی واقعی نامۆ، كە ئەویش ئەوەیە دەسەڵاتدارانی هەرێم پێیانەوە دیارنییە شانازی بكەن بە ئایینی گەلەكەیانەوە و بە مێژووی سەروەریی گەلەكەمان و ئەو هەمووە مزگەوت و خانەقا و نوێژخوێن و سیما ئیسلامییەی كە 1400 ساڵە بووەتە نیشانە و شوناسی كورد”.
ئەمینداری گشتیی یەکگرتووی ئیسلامی ئاماژەی بەوەشکردووە، “ئێمەی مسوڵمانانی كوردستان و شوێنكەوتووی ئایینی ئیسلام پابەندین بە پەیام و تەعلیماتی پێغەمبەری ئیسلام (صلی الله علیه وسلم) و شانازی ئەكەین بە ئایینەكەمانەوە و بە مایەی سەربەرزی و پێشكەوتنی دەزانین، هەر لە پەیامەكەی ئەوەوە فەرهەنگ و بەرنامەی پێكەوەژیانی شوێنكەوتەی ئایین و ئایینزاو نەژاد و نەتەوەكان فێربوین و پەیڕەومان كردوە”.
