وەزیری ناوخۆی عێراق ڕایدەگەیەنێت، بەمه‌به‌ستی پاراستنی موڵك و ماڵی هاوڵاتییان و كۆگا و تیمه‌كانی كۆمسیۆن، ته‌واوی هێزه ئه‌منییه‌كان له ئه‌ركدا ده‌بن وده‌خرێنه ئه‌وپه‌ڕی حاڵه‌تی ئاماده‌باشییه‌وه.
عوسمان غانمی، وەزیری ناوخۆی عێراق لە كۆنگرەیەكی ڕۆژنامەوانیدا ئەمشەو ڕایگەیاند، “سه‌رجه‌م هێزه‌كان له ئه‌ركدا ده‌بن و ئه‌وانه‌شی له‌كاتی پشوودان ده‌گه‌ڕێنه‌وه بۆسه‌ر ئه‌ركه‌كانیان”.
هاوكات بەپێی هەواڵی میدیا عێراقییەكان، هێزێكی زۆری ئه‌منی له شه‌قامە‌كانی به‌غداد بڵاوه‌یان پێكراوه و له چه‌ندین شوێن بازگەیان داناوه.
ئەوەش دوای ئەوە دێت، بڕیارە ئەمشەو كۆمسیۆنی باڵای سەربەخۆی هەڵبژاردنەكان ئەنجامە بەراییەكانی هەڵبژاردن ڕابگەیەنێت.
