بریکاری وەزارەتی ناوخۆی حکومەتی هەرێمی كوردستان ڕایگەیاند، هێزە ئەمنییەکانی سلێمانی بەدوای بکوژی كارمەندەكەی دەروازە ستی-دا دەگەڕێن.
لیوا چەتۆ ساڵح، بریکاری وەزارەتی ناوخۆی حکومەتی هەرێم بە تۆڕی میدیایی ئێستای ڕاگەیاند، “سەبارەت بە ڕووداوەکەی شەوی ڕابردوو کە بەداخەوە بووەھۆی كوشتنی (ه .م .كا ) لەدایكبووی 1990 كە دانیشتووی گەڕەكی شەكرەكەیە و كارمەندی سیکیوریتییە لە دەروازە ستی، کارمەندەكە لەكاتی بەجێگەیاندنی ئەركەكەی لەگەڵ كەسێک دەبێتە شەڕیان و دواتر ئەو کەسە بە دەمانچە ھێرشدەکاتە سەری و برینداری دەکات و دواتر گیانلەدەستدەدات، بکوژی تاوانبار کەسێکی ناسراوە و ناو و ناونیشانی زانراوە”.
لیوا چەتۆ ئاشکراشیکرد، “لە دوای ڕووداوەكەوە هێزە ئەمنییەكانمان لەهەوڵی دەستگیركردنی تاوانبار و بكوژەكەدان تا ڕاپێچی بەردەم یاسای دەكەین و لەكاتی دەستگیركردنی تاوانبارەكەدا وردەكاریی زیاتر دەخەینە ڕوو”.
