بافڵ تاڵەبانی داوا لە د.عەبدوللـەتیف ئەحمەد دەكات ھاوکار و پشتیوانبن بۆ برەودان بە گیانی تەبایی و لێبوردەیی و زیاتر خزمەتکردنی خەڵک.
ئەمڕۆ بافڵ تاڵەبانی، ھاوسەرۆکی یەکێتیی نیشتمانیی کوردستان لە دەباشان پێشوازیکرد لە د.عەبدوللـەتیف ئەحمەد، گفتوگۆکرا دەربارەی بەھێزکردنی گیانی پێکەوەژیان و لێکتێگەیشتن و چارەسەرکردنی کێشە و گرفتەکان لە ڕێگای دیالۆگی بونیادنەرانە و برەودان بە کاری چاکەکاری.
هاوسەرۆكی یەكێتی بە گرنگییەوە ئاماژەی بە ڕۆڵی چاکەخوازانەی مامۆستایان و زانایانی ئایینی کرد لە کۆمەڵگەی کوردەواری لە بەھێزکردنی کەلتوری پێکەوەژیان و ڕێزگرتن لە بەھا پیرۆز و نەتەوەییەکان.
ڕوونیشیکردەوە، یەکێتی بە چاوێکی ڕێزەوە دەڕوانێتە پێگەی ڕەوتی سەلەفییەکان لە ھەرێمی کوردستان، نرخاندنی ھەیە بۆ بیری میانڕەوییان کە لە ڕابردوودا ڕۆڵی گرنگیان بینیوە لە قوڵکردنەوەی گیانی پێکەوەژیان لەنێوان ھەموو نەتەوە و پێکھاتە و ئایینزاکان و پاراستنی ئاسایش و ئاشتیی کۆمەڵایەتی، ھەوڵەکانیشیانی بۆ ڕووبەڕووبوونەوەی بیری توندڕەویی بە گرنگ وەسفکرد، داوایکرد ھەموو لایەک ھاوکار و پشتیوانبن بۆ برەودان بە گیانی تەبایی و لێبوردەیی و زیاتر خزمەتکردنی خەڵک.
