بۆ پشتیوانی لە چالاكوان و ڕۆژنامەنوسانی زیندانیكراوی بادینان كەمپینێك پێكهێنراوە و لە بانگەوازێكدا دەڵێت، مامەڵە لەگەڵ زیندانیان لە توندبوونی بەردەوامدایە بۆیە داوای هاودەنگی دەكات و ڕایدەگەیەنێت، لە 4ی تشرینی یەكەم خۆپیشاندان و گردبوونەوە لەبەردەم دادگاكانی شار و شارۆچكەكان ڕێكدەخرێت.
کەمپینی (هاودەنگی لەگەڵ زیندانیانی بادینان) ئەمڕۆ بانگەوازێكی بڵاوكردەوە و تیایدا هاتووە، زیاتر لە ساڵێکە ژمارەیەکی زۆر کەسایەتی خەمخۆر و دڵسۆزی چاکەی گشتی، بەتۆمەتی ناڕەوا و دوور لە سەرەتایترین بنەمای یاسایی لە زیندانەکان توندکراون و بەشێکیشیان مانیانگرتووە، بەڵام دەسەڵات و دادگاکانی نەک هەر بێدەربەستن بگرە مامەڵەیان لە توندبوونی بەردەوامدایە و بە جۆرێک مامەڵەیان لەگەڵدا دەکەن وەک ئەوەی ئەم کەسانە نەک هاوڵاتی ئەم نیشتمانە نین، بگرە وەک تاوانبارانێک سزایان دەدەن.
دەشڵێت، “زیندانیانی بادینان ئەو کەسانەن کە بەهۆی بەرگری لە ماف و داوا و چاکەی گشتی کۆمەڵگەوە ئازار دەکێشن، غەدرێکی کەم وێنەیان بەرامبەر دەکرێت، هەر بۆیە ناکرێت و شیاونیە نەک بەتەنها جێیان بهێڵین، بگرە ئەبێت ئەوەش لەبیری خۆمان دەرکەین کە پێمانوابێت کۆمەڵێک خەڵکی چالاکی سیاسی و مەدەنیی و ڕۆشنبیران وەک فەرمانبەری بەدەمەوە چوونی کێشەی زیندانیان کاردەکەن و ئەو ئەرکەیان لەئەستۆ گرتووە” بەڵكو ئەرکی هەمووانە لە دەرەوەی زیندان ببنە خاوەنی کێشەکەیان، بەتایبەتیش مامۆستایانی کوردستان و موچەخۆران.
هاوكات ڕوو لە سەرجەم لایەنە سیاسییەكان دەكات و دەڵێت، زیندانیانی بادینان لە زیندانی کەسێک و بنەماڵەیەک و حیزبێکدا نین، بەڵکو ئەوە دامودەزگاکانی ئەو حکومەتەیە، کە لە دەستگیرکردنیانەوە تا ئەشکەنجە و دادگا پرۆسەکەیان بەڕێوەدەبات.
داواش لە سەرۆک کۆماری عێراق دەکەن هەڵوێستی ڕاشکاو و کردەیی هەبێت، بەوپێیەی جگەلەوەی سەرۆکی عێراقی فیدراڵە وەکو پۆستی ئیداری، هاوکات لەگەڵ بەشێکی دەستگیرکراوان لە پەیوەندییەکی سیاسی و ڕێکخراوەییدا بووە.
كەمپینەكە ڕوونیشیدەكاتەوە، کەمپینێکی سیاسی و جەماوەری مەیدانی لە شار و شارۆچکەکانی کوردستان و دەرەوەی هەرێم دەستپێدەکات، لە ڕۆژی 4ی تشرینی یەكەم (دووشەممەی داهاتوو) کە نزیکترین بەرواری دادگایی کۆمەڵێکی دیكەیە لەو گیراوانەیە، وەک ئەرکی ئەخلاقی و نیشتمانی و هاودەنگی لەگەڵ کەسوکاری زیندانیان، ئەو ڕۆژە دەکەنە “ڕۆژی هاودەنگی زیندانیان”.
ئاماژە بەوەشدەكات، لە كاتژمێر 10ی بەیانی ئەو ڕۆژەدا خۆپیشاندان و گردبوونەوەکان لە بەردەم دادگاکانی شار و شارۆچکەکان یان هەر شوێنێک کە ڕێکخەرانی چالاکییەکە پەسەندیدەکەن بەڕێوەدەچێت.
