وەزارەتی کشتوکاڵ و سەرچاوەکانی ئاو، بڕی دوو ملیار و 174 ملیۆن دینار بۆ دروستکردنی بەنداوی “دێوانە” لە گەرمیان تەرخاندەکات.
بەپێی ڕاگەیەندراوێکی فەرمانگەی میدیا و زانیاریی حکومەتی هەرێم، “لەچێوه‌ی گرنگیدانی حكومه‌تی هه‌رێمی كوردستان به سه‌رچاوه‌كانی ئاو و دروستكردنی به‌نداو، سه‌رۆكی حكومه‌تی هه‌رێمی كوردستان ڕه‌زامه‌ندیدا له‌سه‌ر ته‌رخانكردن و خه‌رجكردنی گوژمه‌ی (2,174,078,000) دوو ملیار و سه‌د و حه‌فتا و چوار ملیۆن و حه‌فتاو هه‌شت هه‌زار دینار بۆ پڕۆژه‌ی به‌نداوی دێوانه”.
ئەو بڕەپارەیە به‌شێوه‌ی نه‌ختینه و قۆناغ به قۆناغ له‌سه‌ر بودجه‌ی وه‌به‌رهێنانی وه‌زاره‌تی كشتوكاڵ و سه‌رچاوه‌كانی ئاو خه‌رجده‌كرێت.
دوو ڕۆژ پێش ئێستا وەزیری كشتوكاڵی هەرێم ڕایگەیاند، بۆ تەواوكردن و دروستكردنی بەنداو، داوای زیاتر لە 126 ملیار دیناریان كردووە و وتیشی، وەك قۆناغی یەكەم بڕی 16 ملیار دینار دابینكراوە.
ڕەزامەندییەكە لەسەر بڕی 16 ملیار دینارە بۆ تەواوکردن و دروستکردنی بەنداوەکانی (زەلان، چەقچەق و گۆمەسپان) كە بەشێوەی نەختینە و قۆناغ بە قۆناغ لەسەر بودجەی وەبەرهێنانی وەزارەتی کشتوکاڵ دەبێت.
