ئەندامێکی دەفتەری سیاسیی حزبی دیموکراتی کوردستان، پێیوایە هێرشی سەر حزبەکانی ڕۆژهەڵاتی کوردستان لەمکاتەدا، پەیوەندی بە دۆخی ئێستای عێراقەوە هەیە و ئێران دەیەوێت سوود لە هەژموونی خۆی وەربگرێت و لەکاتی هەڵبژاردندا هێزەکان لەدژی حزبەکانی ڕۆژهەڵات هانبدات.
حەسەن قادرزادە، ئەندامی دەفتەری سیاسیی حزبی دیموکراتی کوردستان بە تۆڕی میدیایی ئێستای ڕاگەیاند، “هێرشەکانی کۆماری ئیسلامیی ئێران بۆسەر حزبەکانی ڕۆژهەڵات، هیچ زیانێکی گیانی و ماددی نەبووە و تەنها زیانی بە باخ و سروشتی ناوچەکە گەیاندووە.”
ئەو بەرپرسەی حزبی دیموکراتی کوردستان وتی، “کۆماری ئیسلامیی ئێران لەماوەی 40 ساڵی ڕابردوودا بەردەوام هەرکاتێک بۆی گونجابێت هێرشیکردووە، ئێستاش بەهۆی ئەو بارودۆخە هەرێمی و ناوخۆییەی لە عێراق هەیە، کۆماری ئیسلامی هەنگاودەنێت و هێرشدەکات، لەگەڵ ئەوەش ئێمە هەمووکات ئامادەبووین و هێزی خۆشمان بەکەم نازانین لەبەرامبەر هێرشەکاندا.”
لەبارەی بەردەوامیی هێرشەکان و ئەگەری هێرش بۆسەر بنکە سەرەکییەکانی حزبەکان، حەسەن قادرزادە ڕایگەیاند، “هێرش بۆسەر حزبەکانی ڕۆژهەڵات هیچ کاتێک دوورنییە و ئێمەش بەپێی بارودۆخ مامەڵەدەکەین و سیاسەتی خۆمان دەبینە پێشەوە.”
ماوەی پێنج ڕۆژە بەبیانووی بوونی حزبەکانی ڕۆژهەڵاتی کوردستان، سوپای پاسداران سنورەکانی ڕۆژهەڵات و باشوور بۆردوماندەکات و ئەمڕۆش لە کاتژمێر 08:00ی بەیانییەوە بۆردومانی سنوورەکان دەکرێت.
