ئاسایشی سلێمانی دەستگیركردنی دوو كەس ڕادەگەیەنێت كە بە قۆڵبڕین و هەڵخەڵەتاندنی فرۆشیارێك لە بەغداد تۆمەتبارن.
بەڕێوەبەرایەتیی ئاسایشی ڕۆژئاوای سلێمانی ڕایگەیاند، دوو کەس بەناوەکانی (ڕ.ب.ص.) دانیشتوی چەمچەماڵ و (ف.ق.م.) دانیشتوی سلێمانی “فێڵیان” لە كەسێك كردووە بەناوی (ع.خ.ع.) دانیشتوی بەغداد.
هەردوو تۆمەتبار بەشێوەی ئۆنلاین مامەڵەیان لەگەڵ كەسی سێیەم کردوە بۆ کڕینی 9 تەولیدی کارەبا، پاش گەیشتنی تەولیدەکان لە بەغداەوە بە سلێمانی، لە قەزای چەمچەماڵ شەش دانەیان داگرتوە و لەلایەن تۆمەتبار (ڕ.ب.ص.) گوازراوەتەوە بۆ باخێک لە سنووری ناحیەی شۆڕش کە خاوەندارێتیەکەی بۆ خۆی دەگەڕێتەوە، سێ تەولیدەکەی دیکەشیان ناردوە بۆ سلێمانی کە لەئێستادا نادیارە، پاشان ژمارەی تەلەفۆنەکانیان داخستووە و پارەیان نەداوە بە فرۆشیار.
ئاسایشی سلێمانی دەڵێت، پاش تۆمارکردنی سکاڵای یاسایی و وەرگرتنی ڕەزامەندی دادوەری دادگای لێکۆڵینەوە، هەردوو تۆمەتبار لەلایەن هێزەکانیانەوە دەستگیرکران و دەستگیرا بەسەر شەش تەولیدەکەی ناحیەی شۆڕش و ئۆتۆمبێلەکانیاندا.
لەئێستاشدا تۆمەتباران بە ماددەی (456) لە یاسای سزادانی عێراقی و بەبڕیاری دادگای لێکۆڵینەوە ڕاگیراون و لێکۆڵینەوە بەردەوامە.
