پۆلیسی گەرمیان ڕایگەیاند، سێ تۆمەتبار، دوای ئەوەی لەکاتی دزیکردندا هەڵاتوون، ئۆتۆمبێلەکەیان وەرگەڕاوە و بە برینداری کەوتنەتە دەستی پۆلیس.
عەلی جەمال قەدوری، وتەبێژی پۆلیسی گەرمیان لە ڕاگەیەندراوێكدا ئاشكرایكردووە، شەوی ڕابردوو لە ناحیەی ڕزگاری دوو پیاو و ئافرەتێک بە ئۆتۆمبێلێكی جۆری جێب واز دەڕۆنە لای ماڵی غازفرۆشێك، كە ئۆتۆمبێلی غازەكەی لەبەر دەرگای ماڵەوە ڕاگرتووە، تۆمەتبارەكەن چەند غازێكیان دزیوە، بەڵام لەوکاتەدا خاوەن ماڵەکە بەئاگادێت و تۆمەتباران هەڵدێن.
وتەبێژی پۆلیسی گەرمیان دەڵێت، لەو كاتەدا غازفرۆشەكە خۆی بە ئۆتۆمبێلی تۆمەتبارەكاندا هەڵواسیوە بۆ ئەوەی هەڵنەیەن، تۆمەتبارانیش دوای ئازاردانی، لە ئۆتۆمبێلەکە فڕێی دەدەنە خوارەوە.
بەپێی ڕاگەیەندراوەكە، “دوای ئەوەی تۆمەتبارەكان بەخێرایی بۆسەر شەقامی کفری هەڵدێن، ئۆتۆمبێلەکەیان وەردەگەڕێت و هەرسێ تۆمەتبار بریندار دەبن”.
لەئێستادا یەکێک لە تۆمەتباران کە شۆفێر بووە، هەروەها خاوەنی ماڵەکەش بەهۆی سەختیی برینەکەیانەوە ڕەوانەی نەخۆشخانەكانی سلێمانی کراون.
پۆلیسی گەرمیان ڕاشیگەیاندووە، “دوو تۆمەتبارەکەی دیکە کە یەکێکیان ئافرەتە، لە بەشی فریاکەوتنی شەهید هەژار لە کەلار چارەسەریان بۆکراوە و بە بڕیاری دادوەر و بەپێی مادەی 446ی یاسای سزادانی عێراقی و ماددەی 23ی یاسای هاتوچۆ، بەندکراون”.
