عێراق.. 13 تاوەری كارەبا تەقێندرانەوە

وەزارەتی كارەبای عێراق دەڵێت، “لە ماوەی 48 كاتژمێردا 13 تاوەری كارەبا لە كەركوك و سەڵاحەدین تەقێندراونەتەوە.”

ڕاگەیاندنی كۆمپانیای گشتیی گواستنەوەی وزەی كارەبای باكوور لە وەزارەتی كارەبای عێراق، ئەمڕۆ پێنجشەممە 5ی ئاب ڕاگەیەندراوێكی بڵاوكردەوە و ئاشكرایكرد، جەنگی تاوەرەكان و بە ئامانجگرتنی هێڵەكانی گواستنەوەی كارەبا فراوانتر بووە و تەنها لە 48 كاتژمێری ڕابردوودا 13 تاوەری كارەبا تەقێندراونەتەوە.

ڕاگەیەندراوەكە ڕوونیكردووەتەوە، هێڵی گواستنەوەی کارەبای کەرکوک- گەیارە كە 400 کەیڤی-یە، لە کەرکوک ڕوبەڕووی هێرشی “تیرۆریستی” بووەتەوە و پێنج تاوەر تەقێندراونەتەوە. هەروەها دوو تاوەری هێڵی گواستنەوەی كارەبای ناحیەی ڕیاز تەقێندراونەتەوە و بەوەش لە پارێزگای كەركوك حەوت تاوەر لەكاركەوتوون.

ئاشكراشیكردووە كە لە پارێزگای سەڵاحەدین شەش تاوەر بە ژمارەیەك بۆمبی چێندراو تەقێندراونەتەوە و ئەوەش زیانی بەر كەرتی كارەبای سامەڕا و دۆر و چەند ناوچەیەكی تری پارێزگاكە گەیاندووە.

وەك وەزارەتەكە باسی كردووە، هێرشەكان كاریگەریی گەورەیان لەسەر كارەبای هەردوو پارێزگای كەركوك و سەڵاحەدین دروستكردووە، بەڵام تیمەکانی کارەبا لە هەوڵدان بۆ چاککردنەوە و بەگەڕخستنەوەی تاوەرەکان.

بابەتی پێشتر

دژەتیرۆر: هەندێك تاقم بۆ چەواشەكاری لۆگۆی دەزگاكەیان بەكارهێناوە و ڕوبەڕووی یاسا دەكرێنەوە

بابەتی دواتر

دوور لە چاوی میدیا ئۆتۆمبێلەكەی سلێمان هەڵشۆیی فرۆشرا

بابەتی پەیوەندیدار
Total
0
Share