بەهۆی ڕووداوێكی هاتوچۆ و كارەساتێكی دوای ڕووداوەكەوە، 12 كەس بوونە قوربانی.
فازڵ حاجی وتەبێژی هاتوچۆی هەولێر لە تۆڕی كۆمەڵایەتیی فەیسبووكەوە بڵاویكردەوە، شەوی ڕابردوو لەسەر ڕێگای سەرەکیی هەولێر – مەخمور و لە نزیک پیرداود، ئوتومبێلێکی لانسەر كە ئۆپڵێكی ڕادەكێشا، لەناكاو ویستوویەتی بەئاراستەی گەڕانەوە بۆ هەولێر پێچبکاتەوە، بەو هۆیەوە هەردوو ئۆتۆمبێلەكە ڕێگەكەیان داخستووە، لەو کاتەشدا تاکسیەکی کۆرۆلا خۆیكێشاوە بە دوو ئۆتۆمبێلەكەی دیكەدا و لە ئەنجامیشدا شوفێری هەرسێ ئۆتۆمبێلەكە بریندار بوون.
فازڵ حاجی ئاشكراشیكردووە، “لەدوای ڕووداوەکە، خەڵک لەسەر شەقام کۆبوونەتەوە بۆ بەهاناوەچوونی بریندارەکان و سەیرکردنی ڕووداوەکە، لەدوای ئەوە بە دوو خولەک، ئۆتۆمبێلێكی ئەڤیۆ لەگەڵ ئۆتۆمبێلێکی تری نەناسراو، كە پێدەچێت زۆر خێرا بووبن، خۆیان بەناو خەڵکەکەدا کردووە، لەو ڕووداوەشیاندا سێ کەس گیانیان لەدەستداوە و 6 کەسی دیكەش بریندار بوون.
