دوێنێ پێنجشەممە، وەزارەتی دەرەوەی ئەمریکا ئاشکرایکردووە، تورکیا بە تۆمەتی هاوکاری خراوەتە لیستی ئەو وڵاتانەوە، کە منداڵ بۆ کاری سەربازی بەکاردەهێنن.
بەپێی هەواڵێکی ئاژانسی ڕۆیتەرز، بەرپرسێکی وەزارەتی دەرەوەی ئەمریکا ئاشکرایکردووە، “ئەوە جاری یەکەمە ئەندامێکی ناتۆ تۆمەتبار بکرێت بە بەکارهێنان یان هاوکاری گروپێک کە منداڵ تێیدا چەکدارە”.
بەرپرسەکەی وەزارەتی دەرەوەی ئەمریکا ئاماژەی بۆ بەکارهێنانی منداڵان لە ڕوبەڕوبوونەوە چەکدارییەکاندا کردووە لە لیبیا، کە دیسان لەو وڵاتەش تورکیا تۆمەتبارە و هیواداریش بووە ئەنکەرە هاوکاری و هەماهەنگی بکات بۆ چارەسەرکردنی ئەو کێشەیە.
لەلایەن بەرپرسەکەی وەزارەتی دەرەوەی ئەمریکاوە ڕاگەیەندراوە “ئەوە جاری یەکەمە ئەندامێکی ناتۆ، کە تورکیایە بەوە تۆمەتباردەکرێت، هیوادارین تورکیا وەک هێزێکی ناوچەکە، ڕونکردنەوە بدات یان ئەوە قبوڵبکات منداڵانی لە ڕوبەڕوبوونەوە سەربازییەکاندا بەکارهێناوە”.
هەر لەمساڵدا وەزارەتی دەرەوەی ئەمریکا گروپی چەکداری “سوڵتان موراد”ی بە بازرگانیکردن بە مرۆڤەوە تۆمەتبارکرد، لەکاتێکدا ئەو گروپە چەکدارە ڕاستەوخۆ هاوکاری و فەرمان لە تورکیاوە وەردەگرێت، لە ڕوبەڕوبوونەوەکاندا لە سوریا.
تورکیا لە دوو هێرشی داگیرکاریدا بۆسەر ڕۆژئاوای کوردستان، ڕاستەوخۆ فەرمانی بە گروپە چەکدارییە سورییەکان کردووە بەشداربن و تورکیا دوای داگیرکردنی شوێنەکان سوپای ناردووە، لەکاتێکدا هاوکاری سەربازی و ئاسمانی لەو گروپانە کردووە.
پێشتریش لەلایەن ڕێکخراوە جیهانییەکانی مافی مرۆڤەوە، گروپە چەکدارییەکانی وەفادار بە تورکیا تۆمەتبارکراون بە چەندین تاوانی دژی مرۆڤ، ئەگەرچی هەر لەسەر بازرگانیکردن بە مرۆڤەوە نوسینگەی نەتەوەیەکگرتووەکان لە ئەنکەرەی پایتەختی تورکیا داوای ڕونکردنەوەی زیاتری لە تورکیاکرد، بەڵام تورکیا تۆمەتەکانی “بێ بنەما” ناوهێنا.
