سەرۆکی ئەنجومەنی پارێزگای سلێمانی لەبارەی ڕووداوەکەی شەوی ڕابردووی سلێمانیەوە دەڵێت، “ئەو هێزانەی لەناو شاردا دادەنرێن دەبێت ڕاهێنانی زیاتریان پێبکرێت، لەسەر چۆنیەتی مامەڵەکردن لەگەڵ خەڵک و ئەو ڕووداوانەی ڕوبەڕوویان دەبێتەوە”.
ئازاد محەمەدئەمین، سەرۆکی ئەنجومەنی پارێزگای سلێمانی بە تۆڕی میدیایی ئێستای ڕاگەیاند، “ئەو هێزانەی لەناوشاردا دادەنرێن بۆ پاراستنی سەروماڵی هاوڵاتییان، دەبێت ڕاهێنانیان پێبکرێت و بزانن چۆن مامەڵە لەگەڵ حاڵەتی هاوشێوەی شەوی ڕابردوو، یان هەر حاڵەتێکی دیکەدا دەکەن”.
سەرۆکی ئەنجومەنی پارێزگای سلێمانی ئاماژەی بەوەشکرد، “لەبارەی ڕووداوەکەی شەوی ڕابردوو لیژنەی ئەمنی و لایەنە پەیوەندیدارەکان کۆدەبنەوە و لێکۆڵینەوەی زیاتر لە ڕووداوەکە دەکرێت”.
شەوی ڕابردوو شەڕەتەقە لەنێوان دوو هێزی ئەمنیی شاری سلێمانیدا ڕوویدا و چەند بریندارێکی لێکەوتەوە.
