نیگەرانییەکان لەبارەی زۆربوونی هێرشی گروپە چەکدارییەکان زیادیکردووە و ئەمڕۆش شانەی ڕاگەیاندنی ئەمنیی عێراق ئاشکرایکرد لە ڕۆژئاوای موسڵ دەستیان بەسەر سەکۆیەکی موشەکی جۆری گراددا گرتووە.
شانەی ڕاگەیاندنی ئەمنیی عێراق ڕایگەیاند، ئەو سەکۆیە 5 موشەکی جۆری گراد و چوارچێوەی تەقاندنی موشەکەکانی تێدابووە و ئامادەبووە بۆ ئاڕاستەکردن، هەرچەندە ئامانجی موشەکەکانی دەستنیشان نەکردووە.
لە ماوەی نزیکەی 20 ڕۆژدا ئەوە جاری سێهەمە کە سەکۆی موشەکی لەلایەن هێزە ئەمنییەکانی عێراقەوە ئاشکرادەکرێت، لەگەڵ ئەوەش دۆزینەوەی سەکۆموشکییەکان و نەتەقاندنیان جۆرێک لە گومانی دروستکردووە، کە دەکرێت ئامانجی گروپە چەکدارەکان تەنها پەیامبێت نەک هێرشکردن.
