هەپەگە بەكارهێنانی كیمیایی و گازی ژەهراوی لەلایەن توركیاوە لە دژی گەریلا لە باشووری كوردستان دووپاتدەكاتەوە، دەشڵێت، توركیا لەماوەی مانگێكدا، هەموو ڕۆژێك و بێوەستان بۆردوومانی ئەنجامداوە.
ناوەندی چاپەمەنی و ڕاگەیاندنی هێزەکانی پاراستنی گەل – هەپەگە، ئاماری شەڕی مانگێكی دژی توركیا لە باشووری كوردستان بڵاوكردەوە، ئامارەكان تایبەتن بە هێرشەكانی توركیا بۆسەر ئاڤاشین، مەتین و زاپ.
بەپێی ئامارەكانی هەپەگە، هێزەکانی گەریلا لەمانگێكدا 169 چالاکییان ئەنجامداوە، هێزی ئاسمانیی گەریلاش 34 چالاکیی ئەنجامداوە، “لەو چالاکییانەدا 238 داگیرکەر سزادراون و 39 گەریلاش شەهید بوون، دەیان سەنگەر، پەناگە و کەرەستەى سەربازیی دوژمن تێکشکێندراون”.
هەپەگە دوپاتیكردووەتەوە، سوپای توركیا هەموو رۆژێك و بێوەستان بۆردوومانی ئەنجامداوە، “42 جار هەوڵیداوە بچێتە نێو تونێلەکانی شەڕ و هەموو جارێک تێکشکێندراوە”.
ئەوەی جێی سەرنجە لە ئامارەكانی هەپەگەدا، دووپاتكردنەوەی بەكارهێنانی كیمیاییە لەلایەن توركیاوە دژی گەریلا، ئاشكرایكردووە، لەمانگێكدا توركیا 12 جار گازی ژەهراوی و کیمیایی بەکارهێناوە.
