وەزارەتی کشتوکاڵ و سەرچاوەکانی ئاوی هەرێمی کوردستان، بڕیارێکی وەزارەتەکەی سەبارەت بە خستنەبازاڕی بەرهەمی سەربڕخانەکانی پەلەوەر بڵاوکردەوە و ڕایگەیاند، دەبێت لە دوای 21ی ئایارەوە سەرجەم سەربڕخانەکان بە ستیکەر و باڕکۆدی تایبەتەوە بەرهەمەكانیان بخەنە بازاڕەوە.
لە بڕیارەکەی وەزارەتی کشتوکاڵدا هاتووە، “لە پێناو پارێزگاری لە بەرهەمی ناوخۆیی سەربڕخانەکانی پەلەوەر لە پارێزگاکانی هەرێمی کوردستان، بەمەبەستی خستنەبازاڕی بەرهەمی (مریشک و پارچەکانی فرێش و بەستوو) لە بەرواری 25/4/2021 بەژمارە (2616) سەرجەم سەربڕخانەکان ئاگادارکراونەتەوە بۆ خستنەبازاڕی بەرهەمەکانیان تا بەرواری 21/5/2021”.
وەزارەتی کشتوکاڵ بڕیاریداوە، لەدوای بەرواری 21/5/2021 هەر بەرهەمێکی خۆماڵی بەبێ ستیکەر و بارکۆدی پەسندکراوی وەزارەت لە بازاڕەکاندا بێت، بەساختە هەژمار دەکرێت.
ئاماژە بەوەشکراوە، “بۆ گرتنەبەری ڕێکاری یاسایی، وەزارەتی کشتوکاڵ و سەرچاوەکانی ئاو نوسراوێکی فەرمیی ئاڕاستەی وەزارەتی ناوخۆ کردووە بۆ قەدەغەکردنی بەرهەمی بێ ستیکەر و بارکۆدی پەسندکراو”.
