لە عەفرین، ژمارەیەك لە ئەندامانی گروپە چەكدارییەكانی سەر بە توركیا خۆپیشاندانیان كرد، نیگەرانن لە كەمی و دواكەوتنی مووچەكانیان، كە لەلایەن توركیاوە بۆیان دابیندەكرێت.
ئێوارەی دوێنی لە عەفرین ئەندامانی ژمارەیەك لە گروپە چەكدارییەكانی سەر بە توركیا، بەتایبەت “الجیش الحر”، خۆپیشاندانیان كرد و ناڕەزایەتییان دەربڕی، نیگەرانن لەوەی ماوەی چەند مانگێكە، ئەو مووچەیەی لەلایەن توركیاوە بۆیان دابیندەكرێت، دوادەكەوێت، ئەمە جگە لەوەی بڕەكەی زۆر كەمە و تەنها 400 لیرەی سوری وەردەگرن، كە دەگاتە 50 دۆلاری ئەمریكی.
لە پارچە ڤیدیۆیەكی بڵاوكراوەدا، یەكێك لە چەكدارە سورییەكانی سەر بە توركیا ڕەخنەی ئەوە دەگرێت، كە چەند مانگێكە مووچەكانیان دوادەكەوێت و بە دوو سێ مانگ جارێك مووچەیان پێدەدرێت، بۆیە دۆخیان قورسە و تەنانەت توانای دەستخستنی “نان”یان نییە.
پێشتریش دواكەوتنی مووچەی بەشێك لە ئەندامانی گروپە چەكدارە سورییەكانی سەر بە توركیا، ناچاریكردبوون ڕازیبن بەوەی بەرامبەر بە پارەی زیاتر، بچنە وڵاتانی دیكەی وەك لیبیا و ئازەرباییجان و بەشداریی شەڕ و ململانێكانی ئەو وڵاتانە بكەن، لە خزمەت بەرژەوەندییەكانی توركیا.
