وەزارەتی خوێندنی باڵا و توێژینەوەی زانستیی هەرێم ئاشكرایكرد، سەرەتاى هەفتەى داهاتوو پرۆسەى خوێندن لە زانکۆ و پەیمانگاكانی هەرێم دەستپێدەكەنەوە.
لە ڕاگەیەندراوێكدا ئەمڕۆ چوارشەممە 24ی ئازار، عەباس ئەکرەم وتەبێژى وەزارەتى خوێندنى باڵا و توێژینەوەى زانستى ڕایگەیاند، “ڕۆژى شەممەى داهاتوو کە دەکاتە (27/3/2021) پرۆسەى خوێندن لە زانکۆ و پەیمانگەکانى هەرێمى کوردستان دەسپێدەکاتەوە، بەشێوەیەک زانکۆکان پابەند دەبن بە ساڵنامەى زانکۆییان کە لە سەرەتاى ساڵی خوێندنى ئەکادیمى داڕێژراوە.”
ئەوەشی خستوەتەڕوو، “بۆ پاراستنی پرۆسەى خوێندن، وەزارەتى خوێندنى باڵا و توێژینەوەى زانستى بەهۆی بڵاوبوونەوەی پەتای جیهانیی کۆڤید-19، بڕیاری پەیڕەوکردنی سیستمى خوێندنى ئاوێتەى داوە وەک پێویستییەکى سەردەم و هاوشێوەى زۆربەى زانکۆ بەناوبانگەکانى جیهان، ئەم سیستمە سەرکەوتنى بەرچاوى لە ناوەندەکانى خوێندنی زانکۆ و پەیمانگەکان بەدەستهێناوە”.
“لەو چوارچێوەیەشدا لەگەڵ دەستپێکردنەوەى پرۆسەى خوێندن لەسەرەتاى هەفتەى داهاتوو بە پابەندبوون بە ڕێنماییە تەندروستییەکان، پرۆسەى خوێندن بە سیستمى ئاوێتە بەردەوام دەبێت”، وەك وتەبێژەكەی خوێندنی باڵای هەرێم ئاماژەی پێكردووە.
