وەزیری دەرەوەی چین ڕایگەیاند، وڵاتەکەی دژی بە سیاسیکردن و قۆرخکارییە لە پرسی ڤاکسینی کۆرۆنادا و ئێستا چین ڤاکسینی کۆرۆنای بەخشیووەتە زیاتر لە 60 وڵات.
وانگ یی، وەزیری دەرەوەی چین لە کۆنگرەیەکی ڕۆژنامەوانیدا دوێنێ 7ی ئازار ڕایگەیاند، ” ڤاکسینەکان چەکێکی بەهێزن دژی ڤایرۆسەکە و هیوایەکن بۆ پاراستنی ژیان، پێویستە خزمەتی هەموو جیهان بکات و سوود بە هەموو مرۆڤایەتی بگەیەنێت لەم چوارچێوەیەشدا زیاتر لە 60 وڵات ڕێگە بە بەکارهێنانی ڤاکسینی چینیی داوە”.
چین پێكوتەی کۆڤیدی- 19 ی بەخشیووە بە 69 وڵاتی تازە گەشەسەندوو جگە لە هەناردەکردنیان بۆ 43 وڵات ” .
لەسەر ئەو پرسە وەزیری دەرەوەی چین وتویەتی ” هیوامان ئەوەیە ڤاكسینەكانی چین متمانە و هیوای زیاتر بۆ شەڕی جیهانی دژ بەو ڤایرۆسە ببەخشن هیوادارین هەموو وڵاتانی بەتوانا ئەوەی لە توانایاندا بێت بۆ دابینکردنی ڤاکسینی پێویست بۆ وڵاتانی دیکە ئەنجامی بدەن ، بە تایبەتی وڵاتانی تازە گەشەسەندوو ، بۆ ئەوەی خەڵک لە هەموو جیهاندا توانای بەکارهێنانی ڤاکسینیان هەبێت، ئەو ڤاکسینانەی کە بە ڕاستی سوود بە خەڵک دەگەیەنن”.
عێراق و هەرێمی کوردستان سودیان لە دیارییەکانی وڵاتی چین بینووە کە هەفتەی ڕابردوو ڤاکسینی دژە کۆرۆنای بۆ ناردن، لە هەرێمی کوردسانیش کوتان بە ڤاکسینەکە دەستیپێکردووە.
