بە وتەی فەرماندەی پۆلیسی چاودێری لە پارێزگای سنە، ئەو 50 پارچە ئاسەوارە لەلایەن چەند کەسێکەوە لە پارێزگاکە و شاری سەقز مامەڵەی پێوەکراوە و توانراوە دەستی بەسەردا بگیرێت.
عەلی ئازادی، فەرماندەی پۆلیسی چاودێری لە پارێزگای سنە دوێنێ 14 ی شوبات ڕایگەیاندووە، “ئەو پارچە ئاسەوارانەی دۆزراونەتەوە هی قەڵای کۆنی زێوییە و لەلایەن چەند کەسێکەوە بە نائاسایی مامەڵەیان پێوەکردووە”.
بە وتەی فەرماندەی پۆلیسی چاودێری لە پارێزگای سنە، سێ کەس بە تۆمەتی بردنی ئەو ئاسەوارانە دەستگیرکراون و لەکاتی پشکنینی ئۆتۆمبیلەکەشیان 50 پارچە ئاسەوار دۆزراوەتەوە.
ئەو بەرپرسەی پۆلیس ئەوەش ئاشکرادەکات کە دوای دۆزینەوەی پارچە ئاسەوارەکان ڕادەستی ڕێکخراوی میراتی کەلتوری کراوە و ئەو کەسانەشی مامەڵەیان پێوەکردووە ڕوبەڕوی دادگا کراونەتەوە.
دۆزینەوەی ئەو پارچە ئاسەوارە سێ هەزار ساڵەیە لە کاتێکدایە هەر دوێنێ لە کاتی دروستکردنی پڕۆژەیەکدا لە شاری کەلار لە گەرمیان دوو شوێنەوار کە ئێسک و پروسکی دوو کەسی تێدا بووە لەگەڵ چەند پارچە کانزایەکی دیکە دۆزراوەتەوە و لە ئێستادا پشکنین بۆ شوێنەکە بەردەوامە”.
