نزیکەی سێ مانگە ژنێکی نیپاڵی کە بە “شەیما” بانگکراوە لە سلێمانی بە ڤایرۆسی کۆرۆنا گیانی لە دەستداوە، ئەمڕۆ 9 ی شوبات بە ڕێوڕەسمێکی مەسیحی و زەردەشی و ئیسلامی و هیندۆسی بە خاکسپێردرا.
ژنە نیپاڵییەکە لە کەنیسەی مەسیحییەکان دانرا و وێردی ئاینەکەی لەسەر خوێندرا، بە هەمان شێوە نوێنەری زەردەشتییەکانیش وێردی خۆیان لەسەر تەرمەکە خوێند، لە کاتی ناشتنیشیدا کەسوکاری ئەو ژنەی شەیما خزمەتی کردووە بە ڕێوڕەسمی ئیسلامی و خوێندنی وێردی ئیسلامی ماڵئاوایان لێکرد، لە هەمان کاتدا هاوڕێکانی شەیما بە ڕێوڕەسمی ئاینی هیندۆسی بۆ کۆتاجار ماڵئاوایان لە شەیما کرد.
شەیما تەمەنی 41 ساڵ بووە و دوای ئەوەی ساڵی ڕابردوو توشی کۆرۆنا بووە وتویەتی بیبەن بۆ نەخۆشخانە چونکە سنگی ئازار دەکات، دوای گەیاندنی بە نەخۆشخانە گیانی لە دەستداوە.
لەماوەی نزیکەی سێ مانگدا لایەنە پەیوەندیدار و ڕێکخراوی داکۆکیکار لە مافی کرێکارانی بیانی هەوڵیانداوە تەرمەکەی بگەڕێننەوە، بەڵام حکومەتی نیپاڵ بە پاساوی ئەوەی توشی کۆرۆنا بووە تەرمەکەی وەرنەگرتووەتەوە.
شەیما خێزاندار بووە و خاوەنی دوو منداڵ بووە، بەڵام وەک خۆی وتوویەتی، بەهۆی خراپی دۆخی ئابوری وڵاتەکەیەوە هاتووەتە کوردستان و لە دوری ماڵ و منداڵەکەی کاری کردووە.
