وەزارەتی دارایی و ئابوریی حکومەتی هەرێمی کوردستان ڕایگەیاند، ئەمڕۆ چوارشەممە لیستی مووچەی مانگی تەمموز و ڕاپۆرتی تەرازووی پێداچوونەوەی مانگی حوزەیران لەلایەن تیمی تەکنیکیی وەزارەتی دارایی هەرێمی کوردستانەوە ڕادەستی فەرمانگەی ژمێریایی وەزارەتی دارایی عێراق کرا.
وەزارەتی دارایی ئاماژەی بەوەشکرد، لەسەر ڕاسپاردەی وەزیری دارایی، ناوی 981 فەرمانبەری گرێبەست کە تەمەنیان لە 60 ساڵ تێپەڕببوو، گەڕێندرانەوە ناو لیستی مووچە و تا کۆتایی ساڵ بەردەوام دەبن لە خزمەتکردن.
