لقی سلێمانیی سەندیکای ڕۆژنامەنووسانی کوردستان ڕایدەگەیەنێت، نابێت ڕێگە بدرێت کەناڵەکان ببنە سەکۆیەک بۆ هەڕەشە لەسەر ئاسایشی نیشتمانی و سنووری سلێمانی.
لقی سلێمانیی سەندیکای ڕۆژنامەنووسانی کوردستان کۆمەڵێک ڕێنمایی نوێی سەبارەت بە بارودۆخی نائاسایی ناوچەکە بڵاوکردەوە و تیایدا هاتووە، پاش دەستپێکردنەوەی گەڕی سێیەمی جەنگی ئەمریکا و ئـ.ـێران، بەهۆی هەستیاریی ناوچەکە و هەرێمی کوردستان، جارێکی دیکە داواکارین کەناڵەکانی ڕاگەیاندن، میدیاکاران و بەکارهێنەرانی تۆڕە کۆمەڵایەتییەکان لە سنووری سلێمانی پابەندی ئەم خاڵانەی خوارەوە بن:
– بەرپرسیارێتیی وتاری میدیاییمان، ئاوێتەی ستراتیجیمان بێت.
– ڕێگە نەدرێت کەناڵەکان ببنە سەکۆیەک بۆ هەڕەشە لەسەر ئاسایشی نیشتمانی و سنووری سلێمانی.
– ھەر سەرچاوەیەک زانیاریی ڕەسمیی نەبێت یان لێدوانی وتەبێژانی دامەزراوە ئەمنییەکانی نەبێت، پشتی پێ نەبەسترێت.
– خۆتان لە بڵاوکردنەوەی وتی وتی و هەواڵی چەواشەکار و بێبنەما بپارێزن.
– ڕووماڵی شوێنی بۆردومان و تەقینەوەکان مەکەن، تا لایەنی بەرپرس پشکنین بۆ شوێنەکە نەکات.
– بڵاوکردنەوەی خێرای وێنە و ڤیدیۆی شوێنە ئەمنییەکان دەبێتە چاوساغیی بۆ لایەنی شەڕکەر.
– لە شوێنی بۆردومانەکاندا میدیا چاوپێکەوتن، کۆبوونەوە و قەرەباڵغی دروست نەکات.
– دروستکردنی مەترسی لەسەر ژیانی هاوڵاتییان هێڵی سوورە.
– دیاریکردنی جوگرافیای شوێنی ڕووداو، شکاندنی پڕۆتۆکۆڵی بەرپرسیارێتیی یاساییە.
– بڵاوکردنەوەی هەر زانیارییەکی سەربازی و ئەمنی، سەقامگیریی کۆمەڵگە دەخاتە مەترسییەوە.
– لە کاتی کەوتنەخوارەوەی درۆن یان مووشەک، ئەو جێگایە دەبێتە شوێنی جەنگ، بۆیە نابێت پەخشی ڕاستەوخۆی تێدا بکرێت.
