لە ئۆپراسیۆنێكی هێزەكانی توركیادا ئەمڕۆ پێنجشەممە 1ی تشرینی یەكەم، 19 كەس بە تۆمەتی لایەنگیریی پەكەكە دەستگیركران كە لەنێویاندا ژمارەیەك كادری هەدەپە هەن.
سایتی ئانادۆڵو بڵاویكردەوە، دەستگیركردنەكە لە چوارچێوەی لێکۆڵینەوەکانی سەرۆکایەتیی داواکاری گشتیی قەرس-ە لە پارتی كرێكارانی كوردستان (پەكەكە).
لەنێو 19 دەستگیركراوەكەدا، هەریەک لە شەڤین ئاڵاجا و موعەزەز چاغریتەکینجی، یاریدەدەرانی سەرۆکی شارەوانی قەرس لەسەر پشکی هەدەپە و جەنگیز ئانڵی، سەرۆکی مەڵبەندی هەدەپە لە قەرس و ژمارەیەک ئەندامی ئەنجومەنی شارەوانی و مەڵبەندی گشتیی هەمان پارت هەن.
هەروەك هێزەكانی توركیا بۆ دەستگیرکردنی ئەو كەسانە، زنجیرە ئۆپراسیۆنێکیان بۆ سەر ماڵ و بینای سەرۆکایەتیی شارەوانی و مەڵبەندی هەدەپە ئەنجامداوە، وەك ئەوەی ئانادۆڵو بڵاویكردووەتەوە.
