سەروەر حاجی شێرزاد، خاوەن کۆمپانیای حەج و عومرە ڕایگەیاند، بەدەل حەج فرت و فێڵی زۆری تێدایە، هەندێک کەس و کۆمپانیا شەهادەی حەجەکە بە 4 هەزار دینار دروستدەکەن و بە 400 دۆلار بە خەڵکی دەفرۆشنەوە.
دەشڵێت، لەگەڵ شەهادەکە، دەبەیەک ئاوی زم زم دەهێننەوە کە ئاوی دڵۆپێندراوی خۆمانە دەڵێت ئەوە حەجەکەمان ئەنجامداوە، بەڵام لە ڕاستییدا خۆیان ناچنە حەج.
لیژنەی فەتوای هەرێمی کوردستانیش لەو بارەیەوە هۆشداریی بە هاوڵاتییان دەدات، بەدەل حەج و ڕیکلامی کۆمپانیاکان فرت و فێڵن و بڕوایان پێمەکەن. دەشڵێت بەگوێرە شەرع کەسێک ناتوانێت لە یەک کاتدا بۆ دوو کەس زیاتر حەج بکات.
نرخی بەدەل حەج (لەجیاتیی بەجێگەیاندنی فەریزەی حەج) لە 200 دۆلارەوە دەستپێدەکات و دەگاتە نزیکی 800 دۆلار. ئەو کەسانەی کە حەجەکە ئەنجامدەدەن، شەهادەیەک و بەڵگەیەکی ڤیدۆیی دەنێرنەوە بۆ حەجخوازەکە.
بەڵام بەڕێوەبەرایەتیی گشتیی حەج و عومرەی هەرێمی کوردستان دەڵێت، ئەو ڕیکلامانە ناڕاست و بێ بنەمان، هەروەها ڕێکاری یاسایی بەرامبەر هەر کەس و کۆمپانیایەک دەگرنەبەر کە ئەو کارە بکات.
