بەڕێوەبەری کەشناسیی سلێمانی ڕایدەگەیەنێت، لە 19ی ئازار تا 6ی نیسان بە نزیکەیی هەموو ڕۆژێک بارانباریوە.
جەوهەر حەمەلاو، بەڕێوەبەری کەشناسیی سلێمانی بە تۆڕی میدیایی ئێستای ڕاگەیاند، “هەمیشە وا تێگەیشتووین کە بارانی بەهار تاوتاوە و چەند ڕۆژێک بەسەریەکەوە نییە، بەڵام ئەمساڵ لە 19ی ئازارەوە تاوەکو 6ی نیسان، بە نزیکەیی هەموو ڕۆژێک بارانباریوە، بۆیە ئەوەی ئەمساڵ لەم چەند مانگەی بەهاردا ڕوویداوە، دیاردەیەکی دەگمەنە لە ئاووهەوای هەرێمی کوردستاندا”.
وتیشی، “لە ساڵانی ڕابردوو دابەشبوونی ڕێژەی دابارین لە ساڵەکەدا بەمشێوەیە بوو، %15ی لە پایزدا دەباری، %50ی ڕێژەکە لە زستاندا دەباری، لە %35ەکەی دیکەشی لە بەهاردا دەباری، بەڵام ئەوەی ئەمساڵ بینیمان بە ڕێژەی %50 زیاتر لە بەهاردا باریوە، ئەوەشی وایکردووە ئەم گۆڕانکاریانە دروستببێت، گۆڕانکارییەکانە لە ئاووهەوادا”.
