قائیمقامیەتی سلێمانی رایدەگەیەنێت، سەرەڕای بەدواداچوونی بەردەوام، مانگی رابردوو تەنها هەشت شوێنکار داخراوە.
قائیمقامیەتی سلێمانی بڵاویکردەوە، بەگوێرەی ئەو ئامارەی لیژنە هاوبەشەکانی قائیمقامیەتی سلێمانی بڵاویانکردووەتەوە، مانگی رابردوو لە سلێمانی نزیکەی 41 تۆن خۆراک، کەرەستەی خراپ و ماوەبەسەرچوو لەناوبراوە و هەشت شوێنی کارکردنیش داخراون.
ئاماژەی بەوەشکرد، هەر لە مانگی یەکی ئەمساڵدا، چوار هەزار و 805 سەردانیان لە سنووری شاری سلێمانی، بۆ بازار و شوێنە گشتییەکان ئەنجامیانداوە و 337 سەرپێچییان تۆمارکردووە.
ئەوەشی خستەڕوو، هەروەها لە مانگی یەکدا، 5 حاڵەتی دادگاییکردن تۆمارکراوە و هەشت شوێنکار بەهۆی سەرپێچییەوە داخراون، ئەو شوێنانەشی کە رووبەڕووی داخستن بوونەتەوە بەهۆی دووبارە ئەنجامدانی سەرپێچی و پابەندنەبوونیان بووە، بەو رێنماییانەی کە پێشتر لە لایەن لیژنە هاوبەشەکانەوە پێیاندراوە.
