رابەری تائیفەی درووزەكانی سوریا هێرشی میلیشیاكان بۆ سەر رۆژئاوای كوردستان بە ‘قڕكردنی كورد’ وەسفدەكات و رایدەگەیەنێت، ئەو شەڕە برا کوردەکانمان دەکاتە ئامانج، کە بەرگرییان لە جیهان کرد لە دژی ئاڵا رەشەکان.
شێخ حیکمەت هیجری، رابەری تائیفەی درووزەكانی سوریا رایگەیاند، لە ژێر رۆشنایی ئەو شەڕە دڕندانەیەی کە رژێمی دیمەشق و گرووپە بەکرێگیراوەکانی، لەگەڵ ئەوانەی خۆیان بە خێڵەكان ناودەبەن، لە دژی شار و گوندە کوردنشینەکانی باکووری رۆژهەڵاتی سوریا و کاردانەوەی ئەم شەڕە لەسەر سوریا و ناوچەکە بەگشتی، دووپاتی دەکەینەوە، ئەوەی روودەدات، شەڕی قڕکردنە كە برا کوردەکانمان دەکاتە ئامانج، ئەوانەی بەرگرییان لە جیهان کرد لە دژی ئاڵا رەشەکان.
ئاماژە بەوەشدەكات، داوا لە گەلەکەمان دەکەم، بە یەکگرتوویی شانبەشانی خوشک و برا کوردەکانیان بوەستن، لە هەموو شوێنێک، چ لێرە و چ لە دەرەوەی وڵات، خۆپیشاندانی بەرفراوان ئەنجامبدەن و پشتیوانییان بکەن لە بەرخۆدانیان، لەپێناو بوونی خۆیان، کورد خوشک و برای ئێمەیە و ئەرکە لەسەرمان لە تەنیشتیان بوەستین و پشتیوانییان بکەین. ئێمە دڵنیاین لە سەرکەوتنیان بەسەر هێزەکانی تاریکیدا.
