سەعدی پیرە رایدەگەیەنێت، لە کۆبوونەوەکەی ئەمڕۆ هاوهەڵوێست بووین کە پەیوەندیمان لەگەڵ دۆستەکانمان بخەینەگەڕ بۆ راگرتنی پەلامارەکان بۆ سەر کوردانی رۆژئاوا.
سەعدی پیرە، ئەندامی مەکتەبی سیاسیی یەکێتیی نیشتمانیی کوردستان بڵاویکردەوە، ئەمڕۆ چوارشەممە وەفدێکی یەکێتیی نیشتمانیی کوردستان بە سەرپەرشتی سەعدی پیرە، ئەندامی مەکتەبی سیاسی، سالار سەرحەد، ئەندامی سەركردایەتی و لێپرسراوی پەیوەندییە كوردستانییەكانی یەكێتیی نیشتمانیی کوردستان بەشداریکرد لە کۆبوونەوەی لایەنە کوردستانییەکانی باشوور، بۆ یەکخستنی هەڵوێستە سیاسیەکان لە پێناو پشتیوانیی بۆ گەلی کوردمان لە رۆژئاوای کوردستان.
ئەوەشی خستەڕوو، لە کۆبوونەوەکە هاودەنگ و هاوهەڵویست بووین کە هەموو رێگەیەکی خەبات بگرینە بەر بۆ پاراستنی دەستکەوتەکانی ئیدارەی خۆسەری لە رۆژئاوا، هەروەها پەیوەندییە هەرێمی و نێودەوڵەتییەکانمان لەگەڵ دۆستەکانمان بخەینە گەڕ بۆ راگرتنی ئەو پەلامار و دەستدرێژیانەی دەکرێتە سەر گەلەکەمان لە رۆژئاوا.
