بەپێی زانیارییەکان، ئەو کچە شەڕڤانەی حەلەب کە سوکایەتی بە تەرمەکەی کرا و لە باڵەخانەیەکەوە فڕێدرایە خوارەوە، پێش مردنی کارێکی کەموێنەی کردووە.
میدیاکانی رۆژئاوای کوردستان ئاشکرایانکردووە، ناوی کچە شەڕڤانەکە (دەنیز)ـە و قەناس بەدەست بووە، دوای ئەوەی رووبەڕووی هێزێکی زۆری نزیک لە حکومەتی دیمەشق بووەتەوە، بە قەناسەکەی دەستی نزیکەی 20 چەکداری لێ کوشتوون.
ئاماژەیان بەوەشکردووە، دوای ئەوەی گوللە لە قەناسەکەیدا نامێنێت، چەکێکی جۆری (کڵاشینکۆڤ) بەکاردەهێنێت و بەو چەکەش چەند چەکدارێکی دیکە دەکوژێت تاوەکو ئەو کاتەی یەک گوللە لە چەکەکەیدا دەمێنێت و هێزەکان گەمارۆی دەدەن؛ لەکۆتاییدا بەو گوللەیە، کۆتایی بە ژیانی خۆی دەهێنێت.
بۆیە پاش ئەم رووداوانە، هێزەکانی نزیک لە حکومەتی دیمەشق، سوکایەتی بە تەرمی ئەو کچە شەڕڤانە دەکەن و لە باڵەخانەیەکی بەرزەوە، فڕێیدەدەنە خوارەوە و ڤیدیۆی تۆماردەکەن؛ کە ڤیدیۆکە دەنگدانەوەیەکی ناڕەزایی گەورەی لە سۆشیال میدیای جیهانیی لێکەوتەوە.
