بەڕێوەبەری گشتیی بازرگانیی هەرێمی کوردستان رایدەگەیەنێت، پشکی جوتیارانی هەولێر و دهۆک دابەشکراوە و لەم هەفتەیەشدا، پارەی جوتیارانی سلێمانی دابەشدەکرێت.
نەوزاد شێخ کامیل، بەڕێوەبەری گشتیی بازرگانیی هەرێمی کوردستان رایگەیاند، دوای گەیشتنی پارەکە لە بەغدادەوە، رۆژانی چوارشەممە و پێنجشەممەی هەفتەی رابردوو راستەوخۆ دەست بە دابەشکردنی شایستەی دارایی جوتیاران کرا لە سایلۆکان و جوتیارانی پارێزگاکانی هەولێر و دهۆک پارەکەیان وەرگرت.
وتیشی، هەوڵدەدەن لەم هەفتەیەدا شایستەی دارایی جوتیارانی پارێزگای سلێمانییش دابەشبکەن.
کۆی گشتیی ئەو پارەیەی لەم قۆناغەدا لە بەغدادەوە گەیشتووە، 24 ملیار و 250 ملیۆن دینار بووە؛ لەو بڕە 9 ملیار و 500 ملیۆن دیناری بۆ پارێزگای سلێمانی، 7 ملیار و 750 ملیۆن دیناری بۆ پارێزگای هەولێر و 7 ملیار دیناریشی بۆ پارێزگای دهۆک تەرخان کراوە.
