ئەمڕۆ 28_ەمین فێستیڤاڵی گەلاوێژ لە شاری سلێمانی دەستپێدەکات و ماوەی سێ رۆژ بەردەوامدەبێت.
بنکەی روناکبیریی گەلاوێژ بڵاویکردەوە، ئەمڕۆ پێنجشەممە لەژێر ناونیشانی “”با داهێنانەکان لە پێناو جوانی و بەها مرۆییەکاندا بن” 28ەمین خولی فێستیڤاڵی گەلاوێژ لە تەلاری هونەر دەستپێدەکات و ماوەی سێ رۆژ بەردەوام دەبێت.
پێشتر د. ئیبتیسام ئیسماعیل، سەرۆکی بنکەی روناکبیریی گەلاوێژ، بە تۆڕی میدیایی ئێستای راگەیاندبوو، فێستیڤاڵی گەلاوێژ بەردەوام لە نوێگەریدایە ئەمساڵ میوانەکان لە هەر چوار پارچەی کوردستان و وڵاتانی دەرەوە، بەشداردەبن و پێشانگەی شێوەکاریی نێودەوڵەتی لەناو فێستیڤاڵەکەدا دەبێت.
ئاماژەی بەوەشکرد، جگە لە پێشانگەی شێوەکاری، پێشانگەی کتێب و کاری دەستییش هەیە لە فێستیڤاڵی گەلاوێژ، لەگەڵ ئاهەنگێکی گۆرانی، بە بەشداریی دوو هونەرمەندی گەورەی کورد، (ناسڕی رەزازی و ئەیوب عەلی).
