قوباد تاڵەبانی رایدەگەینێت، لەگەڵ ئەوەداین لەم خولەی ئەنجومەنی نوێنەرانی عێراق یاسای نەوت و غاز پەسەندبکرێت.
قوباد تاڵەبانی جێگری سەرۆکوەزیرانی هەرێم رایگەیاند، لەگەڵ ئەوەداین لەم خولەی ئەنجومەنی نوێنەران یاسای نەوت و غاز پەسەندبکرێت، بە جۆرێک کە کێشەکانی نێوان هەرێم و بەغدا یەکلابکاتەوە و بەپێی دەستووریش دەسەڵاتەکان و تایبەتمەندییەکانی هەرێم لە یاساکەدا پارێزراوبێت.
وتیشی، لەکۆبوونەوەم لەگەڵ وەفدێکی ئەنجومەنی بازرگانیی ئەمریکا – کوردستان لەبارەی گازی کوردستانەوە روونمکردەوە ئەولەوییەتی ئێمە بەکارهێنانییەتی بۆ پڕکردنەوەی پێداویستییەکانی ناوخۆ و گەشەپێدانی ژێرخانی پیشەسازی و ئابوریی هەرێم.
باسی لەوەشکرد، داواشمکرد کۆمپانیا ئەمریکییەکان بەشدارییەکی کاراتر و کاریگەرتریان هەبێت لە پرۆسەی گەشەپێدانی کوردستاندا و حکومەتی هەرێمیش ئامادەیە بۆ پێشكەشکردنی هەموو جۆرە هاوکاری و کارئاسانییەک.
