سەرۆکی دەستەی هەڵبژاردنەکان لە هەرێمی کوردستان رایدەگەیەنێت، لە سلێمانی، هەولێر و دهۆک لیژنە پێکهێنراوە بۆ جێبەجێکردنی یاساکانی کۆمسیۆنی باڵای هەڵبژاردنەکان.
نەبەرد عومەر، سەرۆکی دەستەی هەڵبژاردنەکان لە هەرێمی کوردستان لە لێدوانێکدا ئاشکرایکرد، “لە سلێمانی 79 بنکە، لە هەولێر 53 بنکە و لە دهۆک 41 بنکەی دەنگدانمان هەیە و بەردەوام چاودێری پرۆسەکانی هەڵمەتی بانگەشەی هەڵبژاردن دەکەین”.
لەبارەی سزای سەرپێچیکارانەوە وتیشی، “سێ جۆر سزامان بۆ سەرپێچیکاران داناوە، سزای پێبژاردن کە لە 100 هەزارەوە دەستپێدەکات تاوەکو 10 ملیۆن دینار، هەروەها سزای دوورخستنەوە و بەندکردنی کاندیدەکانیشمان هەیە کە ئەنجومەنی کۆمسیاران بڕیاری لەبارەوە دەدەن”.
ئاماژەی بەوەشکرد، “تائێستا لە هەرێمی کوردستان هیچ پێشێلکاری و سەرپێچییەک لە کاتی هەڵمەتی بانگەشەی هەڵبژاردن تۆمارنەکراوە”.
