مەكتەبی سیاسیی یەكێتیی نیشتمانیی كوردستان لە یانزەیەمین ساڵڕۆژی جینۆسایدی ئێزدییەكان لە راگەیەنراوێكدا دەڵێت،” یەكێتیی نیشتمانیی كوردستان پشتیوانی و هاوكاریی خۆی دووپاتدەكاتەوە بۆ هەر هەنگاوێك كە ببێتە مایەی بووژاندنەوە و سەقامگیری لە شەنگال و بەجینۆسایدناساندنی ئەو تاوانە لە ئاستی نێودەوڵەتیدا و ئاماژە بۆ ئەوەش كراوە، “لە هەموو كاتێك زیاتر پێویستمان بە بڕیارێكی یەكگرتوو هەیە، لە نێوان حكومەتی هەرێم و حكومەتی عێراقدا كە سەرجەم لایەنەكانی كوردستانیش پشتگیری و پشتیوانیی لێبكەن لەپێناوی گەڕاندنەوەی سەرجەم ئاوارەكان بۆ سەر زێدی خۆیان”.
دەقی راگەیەنراوەكەی مەكتەبی سیاسیی یەكێتیی نیشتمانیی كوردستان:
لە یانزەیەمین ساڵڕۆژی جینۆسایدی خوشك و برا ئێزدییەكان و پەلامارە داگیركاری و وێرانكارییەكانی تیرۆریستانی داعش بۆ سەر شەنگال و دەوروبەری، سەری رێز و نەوازش بۆ شەهیدانی ئەو كارەساتە دژ بە مرۆڤایەتییە دادەنەوێنین و بەخەمێكی پڕ لە ئازارەوە ئەم یادە دەكەینەوە.
ئێزدییەكان وەك خاوەنی رەسەنی شەنگال و دەوربەری لە بزووتنەوەی كوردایەتیدا هەمیشە پێشەنگ بوون و رۆڵی پڕ جوامێرانەیان بینیوە، بۆیە بە درێژایی مێژوو لەلایەن داگیركەرانەوە چەندینجار پەلاماردراون و (فرمان) كراوەتە سەریان.
بۆ ساڕێژبوونی یەكجارەكیی ئەو زامە پڕ لە سوێیە، ئێستا لە هەموو كاتێك زیاتر پێویستمان بە بڕیارێكی یەكگرتوو هەیە لە نێوان حكومەتی هەرێم و حكومەتی فیدڕاڵدا كە گشت لایەنەكانی كوردستانیش پشتگیری و پشتیوانیی لێبكەن لەپێناوی گەڕاندنەوەی گشت ئاوارەكان بۆ سەر زێدی خۆیان.
هەر بۆ ئەو مەبەستەش یەكێتیی نیشتمانیی كوردستان پشتیوانی و هاوكاریی خۆی دووپاتدەكاتەوە بۆ هەر هەنگاوێك كە ببێتە مایەی بوژاندنەوە و سەقامگیری لە شەنگال و بەجینۆسایدناساندنی ئەو تاوانە لە ئاستی نێودەوڵەتیدا.
دروود بۆ رۆحی پاكی شەهیدانی شەنگال و سەرجەم شەهیدانی رێگای رزگاریی كوردستان
مەكتەبی سیاسیی
یەكێتیی نیشتمانیی كوردستان
