وەزارەتی نەوتی عێراق رایدەگەیەنێت، لە هەڵوەشاندنەوەی رێککەوتنی گواستنەوەی نەوت بە بۆری لە رێگای تورکیاوە ئاگادارکراونەتەوە و رێککەوتنێکی نوێش واژوودەکرێت.
سەرچاوەیەک لە وەزارەتی نەوتی عێراق بە میدیاکانی عێراقی راگەیاندووە، رێککەوتنی گواستنەوەی نەوت بە بۆری لەنێوان تورکیا و عێراقدا لە ساڵی 1973 واژوو کراوە و لە ساڵی 2010 هەموار کراوەتەوە، بەپێی رێککەوتنەکە دەتوانرێت کۆتایی بە رێککەوتنەکە بهێنرێت بە خواستی یەکێک لە لایەنەکان بەو مەرجەی ساڵێک بەر لە هەڵوەشاندنەوەکەی وڵاتی یەکەم وڵاتی دووەم ئاگاداربکاتەوە.
ئاماژەی بەوەشکرد، عێراق لە هەڵوەشاندنەوەی رێککەوتنەکە لەسەر خواستی تورکیا ئاگادارکراوەتەوە، نووسراوی رەسمیش بۆ وەزارەتی هاتووە کە ئاماژە بە خواستی تورکیا دەکات بە بەستنی رێککەوتنێکی نوێ کە ئامانجی فراوانتر لە خۆی بگرێت.
ئاشکراشیکرد، سەرقاڵی پێداچوونەوەن بەو رەشنووسەی لەلایەن تورکیاوە پێشکەشیان کراوە، تا بگەن بە شێوازێک لە رێککەوتن کە لە بەرژەوەندییان بێت.
