وەزارەتی ئاوەدانکردنەوە رایگەیاند، لە ماوەیەکی نزیکدا یەکەی نیشتەجێبوون دابەشدەکرێت.
وەزارەتی ئاوەدانکردنەوە و نیشتەجێکردنی هەرێم، لە راگەیەندراوێکدا بڵاویکردەوە، دانا عەبدولکەریم، وەزیری ئاوەدانکردنەوە و نیشتەجێکردن رایگەیاند دوابەدوای کۆتاییهاتنی پرۆسەی جیاکردنەوەی ناوەکان بەشێوەیەکی شەفاف و بە ئامادەبوونی نوێنەری کرێنشینان لەماوەیەکی نزیکدا ناوەکان رادەگەیەنرێت و یەکەکان بەسەر کەمدەرامەتان و کرێنشیناندا دابەشدەکرێن.
بەپێی راگەیەندراوەکە، وتەکانی دانا عەبدولکەریم، وەزیری ئاوەدانکردنەوە و نیشتەجێکردن لەمیانەی کۆبوونەوەیەکدا بووە لەگەڵ بەڕێوەبەری گشتیی دیوانی وەزارەتی ئاوەدانکردنەوە و نیشتەجێکردن و سەرجەم جێگری بەڕێوەبەرە گشتییەکانی وەزارەت بۆ نیشتەجێبوون، ھەروەھا لە کۆبوونەوەکەدا نوێنەری کرێنشینان ئامادەبوون و تیایدا گفتوگۆکرا دەربارەی دواھەنگاوەکانی جیاکردنەوەی ناوی ئەو هاوڵاتییانەی کە فۆڕمی یەکەکانی نیشتەجێبوونیان پڕکردووەتەوە.
وەزارەتەکە دەڵێت، رۆژی 8ی ئابی 2023، دانا عەبدولکەریم، وەزیری ئاوەدانکردنەوە و نیشتەجێکردن، لە رێوڕەسمێکدا پرۆسەی دابەشکردنی فۆڕمی یەکەی نیشتەجێبون و کاراکردنی فۆڕمەکەی بەشێوەی ئۆنلاین، بۆ ھاوڵاتییانی کەمدەرامەت راگەیاند و لەماوەی کارابوونی فۆڕمەکە زیاتر لە 25 هەزار خێزان فۆڕمی یەکەکانی کرێنشینان و کەمدەرامەتانیان پڕکردەوە.
