بەڕێوەبەرایەتیی پۆلیسی سلێمانی رایدەگەیەنێت، مەفرەزەكانی نووسینگەی ناو بازاڕی بەشی پۆلیسی نەهێشتنی تاوانی سەر بە بەڕێوەبەرایەتییەکە، تۆمەتبارێکیان دەستگیركرد کە زیاتر لە 150 ملیۆن دینار و بڕێک ئاڵتونی لە ماڵێکدا دزیبوو.
لە راگەیەندراوێکی پۆلیسی سلێمانیدا هاتووە، “هاوڵاتییەك لە نووسینگەی ناو بازاڕی بەشی پۆلیسی نەهێشتنی تاوان سكاڵای تۆماركرد، كە زیاتر لە 150 ملیۆن دینار و بڕێک ئاڵتونی لە ماڵەکەیدا، لە یەکێک لە گەڕەکەکانی شاری سلێمانی لێدزراوە”.
ئەوەشیخستەڕوو، بڕیاری دادوەری تایبەتمەند بۆ دەستگیرکردنی تۆمەتبار وەرگیرا و مەفرەزەكانی نووسینگەی ناو بازاڕی بەشی پۆلیسی نەهێشتنی تاوان، لێكۆڵینەوە و بەدواداچوونەكانیان دەستپێكرد و توانرا تۆمەتبار بدۆزرێتەوە و دەستگیربكرێت، هەروەها دەستگیرا بەسەر تەواوی پارە و ئاڵتونە دزراوەکەدا.
پۆلیسی سلێمانی دەشڵێت، تۆمەتبار (س، م، أ) بە بڕیاری دادوەر و بەپێی ماددەی 446 لە یاسای سزادانی عێراقی، راگیراوە و لێکۆڵینەوە لە کەیسەکە بەردەوامە.
